<div>O Festival Sinsal SON Estrella Galicia, que se celebrará do 23 ao 25 de xullo, anuncia novas actividades paralelas coa intención de poñer en valor o patrimonio ambiental da Illa de San Simón. A cita musical, cuxo cartel secreto encabeza o propio territorio, e que este 2021 quere facer fincapé nos valores máis esenciais do Sinsal - natureza, sostibilidade, experiencia, música ao vivo- ofrecerá un paseo en catamarán pola enseada de San Simón o sábado 24 de xullo, en horario de maña. Neste percorrido, que comezará ás 12.00 horas e terá unha duración aproximada dunha hora e media, o público asistente poderá coñecer o espazo da man dunha guía especializada. A memoria da illa e a historia do seu patrimonio, xunto á natureza e espectacular contorna deste enclave, serán os fíos condutores dunha proposta que, como non podería ser doutro xeito, tamén inclúe un secreto musical.</div><div><br></div><div>A cita no catamarán, cuxas entradas sairán á venda o luns 19 ás 12.00 horas a través da plataforma Enterticket, engade a estrea en directo, durante o paseo, do novo disco dun artista galego, que o público descubrirá no momento de subir ao barco. Deste xeito, Sinsalaudio mantén a súa aposta pola promoción do talento do país á vez que relaciona a cultura galega coa súa contorna natural.</div><div><br></div><div>Xunto á activación da venda de entradas deste paseo, Sinsal SON Estrella Galicia tamén reactivará a venda do último cento de entradas dispoñible para esta edición, nomeada Esencial. A espectación xerada polo regreso á illa de San Simón deu lugar un contratempo no TPV á hora da activación da venda de entradas que, como consecuencia, xerou un pequeno número de incidencias. Tanto o equipo do Sinsal como a plataforma dixital Enterticket seron solución, de xeito individual, a todas as incidencias que se produciron.</div><div><br></div><div>&nbsp;Deste xeito, o vindeiro luns 19, ás 12.00 horas, abrirase a venda das últimas entradas para este Sinsal Esencial, que contará con catorce artistas de Galicia, España, Portugal e Estados Unidos que achegarán durante tres xornadas, algunhas das creacións máis estimulantes do panorama sonoro actual.</div>

Escenario Ensenada: Festival Sinsal SON Estrella Galicia 2021

ENTRADAS

INFORMACIÓN

OTROS EVENTOS